• RUB:
    5.38
  • USD:
    478.91
  • EUR:
    526.42
Басты сайтқа өту
Қазақстан 19 Маусым, 2018

Қ. Тоқаев сарапшылар алдына жаңа міндеттер қойды

389 рет
көрсетілді

Астанада Қазақстанның халықаралық қатынастары жөніндегі кеңесінің жыл сайынғы жиналысы болды. Форумда сөз алған Қазақстан Парламенті Сенатының Төрағасы, Қазақстанның халықаралық қатынастары жөніндегі кеңесінің Құрметті төрағасы Қасым-Жомарт Тоқаев әлем дамуындағы үрдістерді жан-жақты әрі терең талдау тұрғысында Кеңес еліміздің сыртқы саясатындағы маңызды мәселелерді шешуде инновациялық тәсілдер әзірленетін тиімді пікірталас орталығы болуы тиіс екенін айтты.

Қ.Тоқаев негізгі екі ағымның – жаһандану мен ұлтшылдықтың  түйісуі салдарынан туындаған әлемдегі жағдайлардың шиеленісті сипаттарын атап өтті. Төраға сондай-ақ қазіргі замандағы халықаралық қатынастарда бірінші кезекте нарық жолындағы күрес көрініс тауып отырғанына тоқталды. Осыған байланысты ықпалдасу бірлестіктеріндегі процестер салмақты талдауды қажет етеді. Қазақстан экономикасының мүддесіне орай әлеуетін күшейту тұрғысында Еуразиялық экономикалық одаққа ерекше назар аударылуы тиіс. Төраға сарапшыларды жаһандық саясатта салмақты орын ала бастаған ШЫҰ мәселелерімен шұғылдануға шақырды. Қазақстанның Орталық Азиядағы негізгі мемлекеттермен ынтымақтастығы іргелі талдау жұмыстары бойынша дамуы тиіс.

Қ.Тоқаевтың пікірінше, Кеңес аясында жүзеге асатын талдау жұмыстарына институттардың, орталықтардың, жалпы алғанда үкіметтік емес ұйымдардан тұратын бүкіл азаматтық қоғам өкілдерін кеңінен тарту керек.

Баяндамашы Астана халықаралық қаржы орталығының тұсаукесері; Каспий маңы мемлекеттерінің саммиті; Әлемдік және дәстүрлі діндер лидерлерінің VI Съезі секілді алда болатын геосаясаттағы маңызды оқиғалар тұрғысында сарапшылардың күш-жігері қажет болады. Бұл оқиғалар сарапшылардан орта және ұзақ мерзімдегі келешекке кәсіби болжам жасауды және пайдалы ұсыныстар әзірлеуді талап етеді.

Қазақстанның халықаралық қатынастары жөніндегі кеңестің төрағасы Ерлан Қарин Кеңестің 2017 жылғы жұмысы туралы есебі және 2018-2019 жылдарға іс-қимылдың басым бағыттары туралы сөз сөйледі.

Шараға еліміздің сыртқы істер министрі Қайрат Әбдірахманов, Президенттің көмекшісі Нұрлан Онжанов, отандық жетекші талдау орталықтарының басшылары, сарапшылар қауымдастығының өкілдері қатысты.